Beist
Norsklærarar, kva med å la elevane arbeide med NRK-serien «Beist», basert på Michael Stilsons populære ungdomsroman «Bare spille ball»? Vi har laga refleksjonsspørsmål og skriveoppgåver til serien.
Berre 0,22 promille av alle norske fotballspelarar blir profesjonelle. I NRKs dramaserie «Beist» følgjer vi to av dei som drøymer om å spele på den store scena. I tillegg til draumen om å bli proffspelar tek serien opp ei rekkje andre tema som kan vere kjennelege for ungdommar. Serien kan derfor vere eit godt utgangspunkt for både samtalar og tekstskriving om tema som ungdom ofte er opptekne av.
Faktaboks
- Tilgjengeleg frå: 20. april 2023
- Episodar: 8
- Lengd: cirka 20 minutter
- Aldersgrense: 9+
- Produserte av: NRK P3
- Basert på bok av Michael Stilson
- Medverkande: Max Campbell, Martin Tønder, Isaac E. Jacobsen, Brage Sæter, Mariama Ellingsen-Diagne, Deniz Kaya, Amell Basic, Hans Petter Nilsen, Madeleine Brandtzæg Nilsen, Trine Wiggen
Refleksjonsspørsmål og skriveoppgåver
Å lese litteratur eller å sjå film og seriar gir oss høve til å leve oss inn i korleis andre menneske har det, og gjennom litteratur og film kan vi derfor utvikle ei større forståing for både andre og oss sjølve. «Beist» handlar om to gutar som drøymer om ein fotballkarriere, men serien tek også opp ein del andre tema som mange barn og unge kan kjenne seg att i. Det kan til dømes vere kjensler knytt til kva ein må ofre for å følgje draumen sin, eit komplisert forhold til foreldre, kroppspress, venskap, lagkjensle og utanforskap.
Vi har utarbeidd forslag til refleksjonsspørsmål og skriveoppgåver som kan brukast i tilknyting til serien. Refleksjonsoppgåvene kan danne utgangspunkt for både samtalar i klasserommet og for skrivinga til elevane. Nokre oppgåver er spesifikt knytt til handlinga og personane i serien, medan andre oppgåver inviterer elevane i større grad til å trekkje inn eigne erfaringar. Det er både oppgåver knytt til alle åtte episodane og dessutan nokre oppgåver som er meir generelle og som eignar seg å svare på når ein har sett heile serien.
Skriveoppgåvene kan også lastast ned på bokmål og på nynorsk som word-dokument. Vi håpar at du finn oppgåver som kan passe for akkurat dine elevar!
- Kvifor trur du serien har fått tittelen «Beist»? Grunngje svaret ditt.
- Korleis reagerer Elias då han får vite at David har fått proffkontrakt? Kvifor reagerer han slik, trur du?
- Kva inntrykk får du av forholdet mellom Elias og faren? Underbygg det du skriv ved å vise til konkrete hendingar i serien.
- Signeringsansvarleg i Rosenborg vil ikkje skrive kontrakt med Elias før etter finalen. Kvifor er det så viktig for Elias at han får skrive kontrakt med Rosenborg med ein gong?
- Elias fortel trenaren at David drakk alkohol i helga. Var det rett av han å gjere det? Kvifor/kvifor ikkje? Grunngje svaret ditt.
- Etter å ha sett første episode, korleis vil du beskrive vennskapen mellom Elias og David? Underbygg det du skriv ved å vise til konkrete hendingar i episoden.
- David er ikkje motivert for å dra på trening etter det som har skjedd. Kvifor overtalar Elias David til å komme på treninga likevel? Kva fortel dette om Elias?
- Elias og David får til eit godt samspel på treninga, men trenaren er ikkje nøgd. Kvifor er han ikkje nøgd med spelet til Elias?
- Trenaren kallar Elias ein «snitch», men skriv etterpå i ei melding at han ikkje meiner at han er det. Kva tenkjer du om det? Er han ein «snitch»? Kvifor/kvifor ikkje?
- Vi får sjå at David er hos legen. Kva er det legen er bekymra for, og kva seier David for å roe henne?
- Legen seier at kontrollbehovet kan auke i periodar med mykje press. Kva kontrollbehov er det ho snakkar om?
- I opningsscena blir det kryssklipt mellom samtalen mellom legen og David og samtalen mellom Elias og faren. Kvifor har serieskaparane valt å gjere det slik, trur du? Kva verknad får denne kryssklippinga?
- Korleis vil du beskrive forholdet mellom Elias og Mina? Underbygg det du seier/skriv ved å vise til konkrete hendingar i episoden.
- Korleis vil du beskrive samhaldet mellom gutane på laget? Underbygg det du seier/skriv ved å vise til konkrete hendingar i episoden.
- Trenaren seier at det er relasjonane mellom gutane som får dei til å prestere som ein familie på banen. Kva meiner han med det? Grunngje svaret ditt.
- Kva relasjonar er viktig for deg for at du skal gjere ditt beste i ulike samanhengar?
- I episoden får vi sjå ei øving der gutane peikar ut kven av dei andre gutane på laget som er «den modigaste», «diva», «dritsekken» og så vidare. Kvifor trur du at David og Elias peikar ut kvarandre som «den modigaste»?
- Korleis vil du beskrive stemninga blant gutane i garderoben etter treninga? Underbygg det du seier/skriv ved å vise til konkrete hendingar i episoden.
- Episoden har fått tittelen «Spydspiss». Kva vil det seie å vere ein spydspiss, og korleis vil du tolke tittelen?
- Elias prøver å forklare David kvifor han sladra om at David hadde drukke alkohol på festen. Kva tenkjer du om forklaringa hans?
- Faren til Elias kallar Elias for ein idiot. Kvifor gjer han det? Og er du samd med han? Grunngje svaret ditt.
- Berre éin av gutane kan starte på topp i finalen. Kven av dei synest du fortener å starte? Grunngje svaret ditt.
- Episoden har tittelen «Valet». Kva val er det Elias står overfor? Er det eigentleg fleire val det er snakk om? Grunngje svaret ditt.
- Kva tenkjer du om vala Elias og David gjer i denne episoden?
- Korleis vil du beskrive stemninga mellom gutane på bussen? Underbygg det du seier/skriv ved å vise til konkrete hendingar i episoden.
- Kva inntrykk har du av Scott, agenten til Elias? Underbygg det du skriv ved å vise til konkrete hendingar i episoden.
- David følgjer etter Elias og ser at Elias møter agenten sin og ein representant frå Stabæk. Korleis reagerer David på det han ser, og kvifor reagerer han slik, trur du?
- Elias kjem for seint til oppmøtet før kampen. Kvifor fortel ikkje David at han veit kvar Elias er?
- Finalen er i gang, og det står 0-0 til pause. Agenten til Elias vil at han skal vise seg fram og spele meir offensivt. Er det rett av Elias å bryte med matchplanen, synest du? Kvifor/kvifor ikkje?
- Elias blir teken av banen i andre omgang. Kva synest du om denne avgjerda?Grunngje svaret ditt.
- Kva trur du Elias kjenner når han får vite sluttresultatet? Underbygg det du seier/skriv ved å vise til konkrete hendingar i episoden.
- Kva trur du det betyr for Elias at faren kom for å sjå finalen likevel? Og kva tenkjer du om samtalen mellom dei på banketten etter kampen?
- Korleis er forholdet mellom Elias og dei andre gutane på laget etter kampen? Underbygg det du seier/skriv ved å vise til konkrete hendingar i serien
- Scott, agenten til Elias, vil at Elias skal signere for Stabæk. Kva grunngjev han det med? Synest du det er rett av Scott å overtale Elias til å signere? Grunngje svaret ditt.
- Elias kjem på festen, men han blir ikkje inkludert av dei andre gutane. Korleis trur du han opplever det?
- Har du sjølv kjent på det å bli halde utanfor nokon gong? Beskriv kva kjensler ein kan kjenne på i ein slik situasjon.
- Elias vil prate med David. Kvifor er det så vanskeleg for David å tilgi Elias, trur du?
- Korleis trur du David har det på festen? Underbygg det du seier/skriv ved å vise til konkrete hendingar i episoden.
- Kva er det som gjer at Elias bestemmer seg for å signere for Stabæk? Kva tenkjer du om dette valet? Grunngje svaret ditt.
- Kvifor har Scott heile tida loge om at det skulle komme ein speidar frå Dortmund, trur du?
- David kjem på hotellrommet for å la Elias signere finaleballen. Kva kjensler trur du gutane kjenner på? Underbygg det du seier/skriv ved å vise til konkrete hendingar i episoden.
Oppgåver til heile serien
- Både David og Elias drøymer om ein fotballkarriere. Skriv ein tekst om kva du drøymer om å oppnå i livet, og kva du eventuelt må gjere for å oppnå denne draumen.
- Elias står overfor ei rekkje ulike val i løpet av serien, og vala hans er ikkje alltid like gode. Skriv ein tekst om det å ta viktige val i livet.
- Skriv ein tekst der du reflekterer over kva som krevjast av ungdommar som ønskjer å nå toppnivået innanfor ein idrett.
- Skriv ein skjønnlitterær tekst der hovudpersonen må gjere eit vanskeleg val for å oppnå draumen sin.
- Skriv ein tekst der du reflekterer over korleis det er for barn og unge å utsetjast for prestasjonspress i ulike samanhengar.
- Skriv eit lesarinnlegg der du argumenterer for at det er for mykje prestasjonspress i idretten.
- Serienamnet blir introdusert ved hjelp av ulike verkemiddel i kvar episode. Skriv ein kort tekst der du forklarer korleis serienamnet blir introdusert, og fortel kva du synest om dei ulike måtane å gjere det på. Vis til konkrete døme og grunngje svaret ditt.
- Serien tek i bruk ulike filmatiske verkemiddel. Vel ut eit par av desse verkemidla, og skriv ein kort tekst der du reflekterer over kva verknad desse verkemidla har i serien. Du kan til dømes sjå på bruk av lys, klipping, biletutsnitt eller bruk av musikk.
- Vel éin av episodane, og skriv ein (film)analyse av denne episoden.
- Skriv ei melding av serien.
Tips
-
Beist er basert på den populære ungdomsromanen Bare spille ball av Michael Stilson. På omslaget står det at «Boka handler om å elske fotball, uten å være forberedt på de harde realitetene. Om å vinne, uten å miste seg selv, og om å klare seg uten en far».
-
Boken har fått tildelt både Uprisen og Trollkrittet.
Oppgåve til heile serien og romanen
Serien er basert på romanen Bare spille ball av Michael Stilson. Det vil seie at serieskaparane har gjennomført ein adaptasjon av boka, det vil seie ei tilpassing frå eit teiknsystem til eit anna. Ein adaptasjon handlar om å gjennomføre ei rekkje ulike val om kva som skal bevarast og kva som skal fjernast frå den opphavlege teksten, kva som skal leggjast til og kva som eventuelt skal endrast.
Skriv ein tekst der du beskriv og reflekterer over vala serieskaparane har gjort når dei har omskapt boka til ein TV-serie. Kva er likt? Kva er ulikt? Og kvifor trur du akkurat desse vala er gjorde? Er det nokon av desse vala du synest er spesielt gode eller er det nokre val du ikkje synest er så gode?
Relevante lenkjer
-
Martin (19) fra Trondheim spiller en av hovedrollene i ny NRK-serie: – Jeg jubla i gymgarderoben (Adressa).
-
Følg den krevende veien mot proffdrømmen i fotballdramaet «Beist» (NTB).
-
Det finnes ikke en app som får gutta til å lese. Kronikk av Michael Stilson i Adresseavisen.
Fremheva bilete: Anton Østerlund, Veronica Falsen Hiis/NRK.
Alle andre bilete: Anton Østerlund/NRK.